مرحبا يااصدقاء
قبل فترة لما نشرت بوست على حسابي على الانستقرام وذكرت به تحقيق واحد من اهدافي ال100 للعشر سنوات القادمة، وصلتني الكثير من الرسائل اللي تسأل
“شنو هي أهدافج ال100”
“شلون كتبتي 100 هدف”
“شلون دتشتغلين على تحقيقها”

 وباعتبار احنه على بداية سنة جديدة وان شاء الله تكون سنة خير وسعادة ونجاح شنو رايكم أشارككم

 Tips شوية
عن شلون نكتب هذه الاهداف وشلون كدرت اكتب 100 هدف وشلون خطتي بتحقيقها
بس قبل لا ابدي ونصيحة لكل واحد، حياتك ارسمها بطريقتك ولونها بذوقك لاتعتمد على غيرك حتى يرسمها لك او يلونها بالوانه
يعني لا تاخذ اهداف غيرك بس لانه هو قدر يحققها ممكن هي ماتناسبك أو مارح تحس بالفرحة وانت تحققها أو مارح تحققها بنفس النجاح اللي حققها الاول
فليش تسبب احباط ويأس لنفسك .. ابدأ
أكتب أهدافك أنت حتى تشتغلها بشغف وارادة

وخلي ببالك نقطة، لا تقلل من سقف طموحاتك (يعني من يجي على بالك هدف كبير لاتقول لنفسك مارح أقدر احققه، لان عقلك الباطن من فكر بهذا الهدف هو يعرف امكانيتك ويعرف أنك قد تحقيق هالامر فلا تستهين بقدرتك ابداً)

البداية،
بدت هذه الفكرة عندي قبل حوالي سنتين جنت بأيفينت وسألني شخص له مكانة علمية شنو هدفج للخمس سنوات الجاية؟
وقتها كان جوابي: يكون عندي شغلي الخاص وابطل اشتغل كموظفة عادية
لان وقتها هذا كان هدفي اللي شاغل بالي طول الوقت
Safragoبعد ماتركت العمل كموظفة وبديت اشتغل على
صار عندي وقت أكثر أكعد مع نفسي وأفكر واعرف اني شنو اريد بالضبط وشلون اريد حياتي تكون
اتذكرت سؤال هذا الشخص وفكرت به اكثر، هل يستحق هدف واحد خمس سنوات من حياتي؟
العمر مرة واليوم اللي يروح مايرجع واني كلش اقدس وقتي وشلون اقضيه وبشنو اقضيه فحتى لو كان واحد من اكبر اهدافي بالحياة اني اكون صاحبة عمل خاص فهل يستحق الموضوع خمس سنوات؟ يعني 1825 يوم؟؟
زين واذا هدف واحد اخذ خمس سنوات باقي الاهداف رح يبقالها وقت احققها ؟

فقررت اجيب ورقة وقلم وابدي اكتب اني شنو اتمنى احقق بحياتي سواء اهداف صغيرة أو كبيرة
على مجالات متعددة مثل عائلية ، مالية، عملية، ذاتية، اجتماعية
أول يوم كتبت خمس اهداف ، ثاني يوم صاروا 15 وراها 20 وراها 30 وراها 50 وهكذا
ماكتبت كل الاهداف بيوم واحد لان عندي قناعة الانسان يتغير وتتغير اهدافه وطموحاته بالحياة
أكو هدف جنت كاتبته قبل سنة اليوم صرت اشوفه شي تافه مايستحق اني ابذل جهد ووقت حتى احققه ولهذا شطبته
Up to date القائمة

مو دستور نكتبها ولازم نمشي عليها

عادي تعدلون وتشطبون وتضيفون

بالنسبة الي مو كل الاهداف متعلقة بالسفر ولا كلها متعلقة بالعمل أكو اشياء ثانية مثل اني اشترك بحفر بئر مادياً وعملياً بدولة افريقية (هالحلم عندي من اني صغيرة) وان شاء الله احققه
اكو امور على جانب الصحة مثل التزم ب15 دقيقة رياضة يومياً، خمس ايام بالاسبوع عالاقل أكعد قبل ال7 الصبح

والحمد لله الاثنين ملتزمة بيهم صار تقريبا 4 اشهر

🥰أكو اهداف كبيرة مثل يكون عندي سلسلة فنادق 😁 .. يس عود اقدملكم خصم خاص لكم لانكم تشجعوني دائما
وهكذا
ابدوا بالخطوة الاولى وكتبوا هدف او اثنين وبعدها كل يوم او كل فترة رح  يجي على بالكم هدف معين كتبوه لحد ماتنملي قائمة اهدافكم
مو بالضرورة تملون 100 هدف ممكن تكتبون 10 او 20 او 49 العدد مو شي مهم بس المهم يكون عدكم هدف يخليكم تكعدون الصبح تاخذون خطوة وحدة حته يقربلكم له

نجي على طريقتي بتحقيق هذه الاهداف
القائمة طويلة واعترف اني لحد الان ماحققت غير 10 بالمية منها
بس اللي اسويه اني اقراها كل بداية شهر واشوف شنو اللي ممكن احققه هذا الشهر احطه مقابيلي مكتوب على وقة متعلقة على الحايط مقابل لاب توبي حته كل يوم واني داشتغل اتذكر ان اني عندي هدف لازم احققه هذا الشهر

واعرف هوايه منكم يكولون الظروف والوضع والكورونا ماتساعدنا نحقق اي هدف
اسمحولي اكولكم هذه مجرد حجج واهية
مثلا اني جنت مخططة ادرس دبلوم ماركتنك بشهر مارس اللي فات وجان لازم اسافر على دولة ثانية  للامتحان والشهادة  وصار الحظر والاغلاق الكلي وماكدرت
اللي سويته بديت ادور على جامعات تقدم عرض للدبلوم اونلاين واستغليت فترة الحظر اللي صار من شهر 3 اللي فات وكعدت ادرس وكملت وامتحنت وحصلت على شهادتين وحدة اكاديمية ووحدة من جوجل بالتسويق الالكتروني
كل شي بالحياة له حل بس يبقى الشخص شلون يتعامل ويه المشكلة بتحدي أو باحباط؟
😉الخيار بيدكم