هل قرأت رواية اغاثا كريستي جريمة في قطار الشرق السريع؟

اتذكر قريت هالرواية قبل سنوات لما كنت ببغداد بس ماتخيلت بيوم اني رح أعيش تجربة هذه الرحلة وبنفس القطار في الرواية بس بدون جريمة الحمد لله

اضافة اني هوايه كنت اسمع من جدي الله يحفظه عن المحطة العالمية والقطارات التي كانت تنطلق من بغداد الى اسطنبول وشلون كانوا السياح والمستثمرين يسافرون من /الى بغداد عن طريق هذا القطار وشلون كانت خدماته تعتبر على مستوى فخم

المهم، قبل اربع سنوات عرفت اول مرة برحلات هذا القطار وحاولت احجز كذا مرة بس كل مرة الاقي كل الرحلات محجوزة حتى من كنت اختار رحلات بعد شهر وشهرين تطلعلي كلها محجوزة ومارهمت ابدا

بعدها صارت كورونا وتوقفت رحلات القطار سنتين ورجعت هذه السنة ومن اول مافتح الحجز حجزنا رحلاتنا والحمد لله لحقنا وكانت تجربة من العمر حبيت اشارككم تفاصيلها هنا اكثر لاني حسيت ان الصور و الفيديوات الي نشرتها على حساباتي على السوشيال ميديا ما غطت الرحلة صح ولا انطتها حقها

خط رحلة قطار الشرق السريع يعتبر واحد من اربع اجمل خطوط قطارات بالعالم، القطار ينطلق من انقرة الى كارس مرورا بمدن وقرى شرق الاناضول

هذه المدن هوايه قريت عن طبيعتها وجمالها المختلف المميز بس ماتوقعت ابدا اني رح اشوفها بهذا الجمال

بالاول شنو اللي يميز هذه الرحلة؟

هذا القطار تاريخي كان سابقا مشروع يربط بغداد بباريس مرورا باسطنبول، سافر عليه العديد من الشخصيات المعروفة والمشهورة عالميا واليوم تم تحويل هذا القطار الى قطار سياحي ياخذ المسافرين الى شرق الاناضول وطبيعته الساحرة

هذه المدن مو كلش مسلط عليها الضوء سياحيا بالنسبة للاجانب والعرب خصوصا، بينما الاتراك كلش يهتمون بزيارة هذه المناطق والاستمتاع بجمالها

رحلات القطار تتوفر باوقات محددة من السنة لهذا دائما اكو زخم عليها وبصعوبة الواحد يلاقي حجز

رحلة القطار الي تبدي من انقرة الى كارس مدتها تتراوح بين 26-40 ساعة يقضيها الناس وهمه يتفرجون ويستمتعون بمشاهدة المناظر الطبيعية المختلفة بكل مدينة يمرون عليها

برأيي تجربة السفر بالقطار جدا مميزة ضروري تجربتها ولو لمرة واحدة في العمر

رحلتي بقطار الشرق السريع مابدت من انقرة الى كارس وانما العكس (لان مالقيت ولا اي حجز برحلة الذهاب) فكنت مخيرة بين الانتظار لاشهر ومااعرف اذا رح الاقي حجز بعدين والا لا او تجربة رحلة العودة واللي ماتختلف في خط الرحلة

هنا رح اسولف عن رحلة القطار نفسها بس المدن اللي زرناها قبل لانوصل محطة قطارات كارس موجودة ببوستات خاصة بكل مدينة هنا وعلى انستقرامي

خلونا نبدي بهذه الرحلة الفريدة

ارزيجان مدينة صغيرة، تقع في شرق الاناضول وعلى خط القطار السريع

وصلناها  الساعة 8 صباحا ودرجة الحرارة كانت 13 تحت الصفر

المدينة سابقا كان بيها اثار عثمانية من المساجد والمدارس بس لانها على خط الزلازل وتعرضت الى 3 زلازل مدمرة فما بقى بها اي معلم تاريخي

المعلم الوحيد في المدينة هو الشلال وجماله ساحرة بين الماء الجاري والمتجمد

وزرنا مركز المدينة والسوق المسقف فيها، مشهورة المدينة بالعنب وصناعة الصفافير (النحاس) ومنها تتصدر الاواني النحاسية الى المدن التركية وخارجها

حتى الاسعار هناك شفناها ارخص بهوايه من الاسعار اللي باسطنبول وباقي المدن

خلصت جولتنا بالمدينة بسرعة  ورجعنا للقطار حتى ننطلق لمحطتنا الثانية مدينة ديفري

صارت ساعة 10  تحرك القطار بعد ما صفر صفارته التقليدية

كل شي بهذا القطار تاريخي يخليك تعيش تجربة فلم قديم او سافر عبر الزمن لعالم ثاني، عالم بعدها بيه الحياة بسيطة سهلة طبيعية مابيها خراب او تدخل بشري هوايه

بدينا نجهز للفطور، اي لازم هسه نرتب طاولتنا ونجهز فطورنا ونستمتع بالقهوة والشاي مع المناظر الخلابة اللي نمر عليها

موجود مطعم بالقطار، بس احنه حبينا نجهز فطورنا بغرفتنا فكنا جايبين اغلب العدة ويانه من اسطنبول قبل عدا الاكل اللي يخرب: مثل الطماطة والاجبان والزيتون والخبز اخذناه اخر شي قبل لانصعد القطار من كارس

بخصوص الجاي والقهوة اني كنت ماخذه ويايه كويل لتسخين المي هو خاص بالسفر وموجود كهرباء بالغرفة نقدر نستعمله او تقدرون تطلبوه من مطعم القطار عادي

المفروض رحلتنا من ارزيجان الى ديفري تاخذ حوالي 3 ساعات ونص ونوصل لديفري على ساعة 1 ونص

صار توقف بعد ساعة من مغادرة ارزيجان بالبداية توقعنا هذه محطة للتوقف مثل اللي مرينا عليها بالليل، كنا نمر على محطات التوقف بيها يكون وقته قليل 10 دقايق اقل او اكثر بشوية ويكون ممنوع احد ينزل

بس بعد فترة وصلنا خبر ان قطار ثاني عطلان على نفس سكتنا ولهذا لازم نبقى واقفين ننتظر يتصلح يلا ننطلق

المنطقة اللي توقفنا بيها كانت قرية على حدود سيفاس المكان طبيعته تجنن بين البحيرة التركوازية والجبال الخضراء اللي تغطيها قممها الثلوج والقطار اللي واقف بين المروج الخضراء

استعملت الدرون حتى اخذ صور للمنطقة رح اشارككم منها

بعد انتظار اكثر من 3 ساعات وحسب ماسمعت من العاملين بالقطار ان مثل هذا التأخير جدا وارد برحلات القطار بسبب ثلوج على الطريق او عطل قطار ثاني او اي اسباب ثانية

المهم تحركنا بس صار تأخير بجدول رحلاتنا ووصلنا ديفري العصر على ساعة 5 تقريبا

جولتنا بديفري حتكون لساعتين

لان هذه المنطقة عبارة عن قرية تابعة لسيفاس فالحياة بيها جدا بسيطة، هي منطقة جبلية زرنا اول شي الجامع اللي صاير على منطقة جبلية باطلالة على الوادي الي بيه بيوت القرية

الجامع من المعالم السياحية تحت حماية اليونسيكو لانه تاريخي واهم مايميزه هي طبيعة النقوش وتصميم قبة الجامع

مع الاسف الجامع كان تحت الترميم فبس شفناه من بره ماقدرنا ندخل

بعدها توجهنا الى مركز القرية حتى نتغدى، الاكلة التقليدية في المدينة هي كفتة سيفاس

سألت شنو فرقها عن الكفتة العادية اخبرني الشيف انها تكون بدون بهارات او بصل.. فقط لحم وملح

ماكنت متحمسة كلش لتجربتها فطلبنا قطعتين فقط للتجربة وطعمها بصراحة عادي كلش ماتختلف هوايه عن الكفتة العادية

بسبب التأخير اللي صار خلال توقف القطار فجولتنا بالمحطة الاخيرة اللي هي سيفاس لغيناها

وصلنا سيفاس قريب ساعة 10 بالليل ولان الحال كأغلب المدن التركية وكلشي رح يكون مغلق ومعزل بهذا الوقت خصوصا الدنيا برد وثلج فقررنا نقضي الوقت بالقطار وماننزل لهذه المدينة

رحنا لعربة المطعم، وقررنا نسهر هناك شوية

عربة المطعم صايرة بوسط المقطورات .. عدد الطاولات مو كبير ومرات بسبب الزخم يفترض الحجز حتى تلاقون مكان

ماجربت اكلهم للامانة بس هوايه من المسافرين ويانه كانوا يتغدون ويتعشون هناك.. بس القعدة بهذه العربة ينطينا الفرصة للتعرف على المسافرين الباقين ويانه بهذه الرحلة العجيبة

بالاخير تعليق صغير على هذه الرحلة.. خلال الرحلة كنا نمر بمناطق تنقطع بيها الشبكة للتالي لااتصال ولا انترنيت وكنا نقضي وقت حوالي ساعة او اكثر مقطوعين عن التكنولوجيا

كل اللي نسويه نقعد مقابل الشباك ونتفرج على القرى والحياة البسيطة والجبال والانهار ونسمع صوت القطار وهو ماشي

هذه الاوقات بالنسبة الي كانت من احلى اوقات الاسترخاء والتأمل اللي سويتها بحياتي

التأمل بهذا العالم العجيب من عظمة الله سبحانه وتنوع الطبيعة وجمالها واختلاف انماط حياة البشر وتنوعها

التأمل بموقعي من هذا العالم الكبير المتنوع

صدقا كانت من احلى الاوقات اللي قضيتها كمية الاسترخاء وصفاء البال خرافية

فهذه الرحلة مو بس للناس اللي تحب المغامرة وتجربة الامور بالعكس حتى الناس اللي تحس حالها تحتاج تفصل عن الحياة النمطية والروتين الممل رح تستمتع بهذه الرحلة

اسئلة تكررت عن هذه الرحلة

اقدر احجز هذه الرحلة بكل وقت؟ 

مع الاسف لا.. هذه الرحلة تختلف عن الرحلات التقليدية الثانية ، تتوفر بمقاعد محدودة باوقات معينة بالسنة فاذا كنت حاب تطلع هذه الرحلة احجز لما تتوفر ورتب وقتك عليها وليس العكس

هل هي مناسبة للاطفال

برأيي الاطفال اللي يقدرون  يمشون لحالهم من عمر 5 سنوات واكثر الرحلة بالنسبة لهم ممتعة وتجربة جديدة بس الاصغر اعتقد حتكون صعبة ومتعبة عليهم

هل هي مناسبة للكبار بالعمر

بالجروبين الاول والثاني اللي سويناها بسفراكو اشترك ويانه العديد من الاشخاص الكبار بالسن من اعمار 60 وفوق وكانوا مستمتعين بالرحلة، فبرأيي هذا يعتمد على الشخص بعد كل اللي وضحت فوق هل تشوف الرحلة مناسبة لك او لا؟ الجواب يعتمد على الشخص نفسه

ليش اسعارها اغلى من باقي الرحلات

حجز الغرفة في القطار مو رخيص، ولان هذه الرحلة مختلفة عن باقي الرحلات وتتوفر في اوقات محددة بالسنة فما تتقارن بباقي الرحلات الثانية

اي وقت أحلى الشتا او الربيع والصيف؟

حسب كل شخص وشنو يحب، بالشتا رح نمر على المناطق وهي عبارة عن قطعة بياض بينما بالربيع رح تشوفوها وهي ملونة بالوان الربيع

فكل شخص شنو يحب

اذا الرحلة بعد كم شهر احجز من الحين والا انتظر؟

لما تتوفر احجز لان لوقتها تكون المقاعد خلصانه ورح ترجع تنتظر اشهر ثانية حتى تلاقي او احتمال ماتلاقي بعد

بالنسبة رحلتي كانت بشهر فبراير 2 واني حاجزتها من ديسمبر

من وين حجزتي الرحلة؟ شلون نحجز

الرحلة كانت عن طريق شركة سفراكو

يتم الاعلان عن الرحلات المتوفرة على حساب الشركة

واخيرا أعرف هذا البوست صار طويل بس حبيت اشارك بيه تفاصيل الرحلة وخصوصا ان المحتوى العربي على هذه الرحلة قليل

اذا عدكم اي سؤال كتبولياه بالتعليقات